280 × 90

قصيده كتبها غيرى كتيير

9

بقلم ابراهيم جمال

خربشات الروح بتنزف ع الورق
تشبيكات لحروف بتتهجى الحياه
بين هروبى بين حروفى ايه فرق
كلنا رغم اختلافنا خوف ف نفس الاتجاه
الهروب للخوف وسيله
جوا حضن بنت حلوه
ويا احلامها الجميله
او ف حرف ملوش ملامح
عشق لكن باختلاف
اللى عاشق زور ملامحه
واللى خايب ظنه فيها
والتمنى ف عشقها والزهد حاله
بنت من دنيا الخلود
الخدود تفاح بيرسم
هجره من اول وطن
مهما نهرب ف الحروف
لينا ف الاوطان سكن
لو ف يوم البحر يعلى
يهدم البيت والمدينه
ايه هيفضل تانى لينا
ذكرياتنا ف حضن
عينها

جرم نتحاسب عليه
ملعونين بين السطور
وهنعمل ايه
لو هننطق نلقى الف والف سور
معلونين لو قلنا ماتت
مجبورين نوصف جمالها
رغم موتها ف العيون
تبدء الالفاظ تخون
توصف الحرف بجنون
تبقى جاهز للقميص
او هتبقى حد تانى
ف الطريق لابس عريس
سكتك ف الحب واضحه
بدله والفستان كمالها
فرحه قررت اكتمالها
كنت فاكر تختلف عن اى حد
كنت جد
كنت بانى بيت وسد
بس وارد لا اكيد
حلمك المدهون امانى
ينعكس سيره ف ثوانى
تشتعل بالقهره نارك
يتقتل فيك الطموح
تلقى حرفك حبر
متغمس ف روح
تلقى حالتك زى حالتى
الخلاصه من قوالتى
انى بكتب شعرى حاله
بوصف اللى سكت عنه
واللى ياما هربوا منه الف فارس
عشت عمرى لحرفى حارس
زرعى باتحمل حصاده
مش هتفرق ايه حصادك
انت بستانى لمرادك
اختلافنا للكمال
واتفقنا ع الجمال
تكتب الحب ف قصيده
اكتب الحزن اختزال

 
تعليقات الفيس بوك