280 × 90

مفيش ماما

11

بقلم: الشاعرمحمدهلال البيلى

خلاص يعنى مفيش امي .
مفيش ماما.
مافيش اهلا واللا ازيك مفيش ياضنايا مين زيك .
مفيش نومه علي كتافك .دا وشي احلو اذ شافك..
مفيش امي مفيشك وانتي بتلمي تراب همي بصالة قلبي
يا قلبي ويا فرشي و يا عرشي
ويا مالي ويا قرشي و يا فكه وتحويشه
ويا محليه لي العيشه
ويا قلبي اللي كان ريشه يطير في جنتك ياامه.
مافيش ماما مفيش امي
تمانية اتناشر القادم تلات سنوات علي موتك
ولسه بخش في بيتك وبسمع كل يوم صوتك.
وف سريرك انا ابيت.بحسك عايشه جوايا
و بعدك عشت وانا ميت.
خلاص ماتت مفيش يعني ودان هاديه هتسمعني
ياصوت شاديه وقصتها يااحلي حاجه حستها ..
خلاص ماتت.. خلاص امي خلاص ماتت.
خلاص فاتت سماري فحم خلاص طلع الضفر م اللحم.
خلاص يا احمد خلاص يا حنان . خلاص ماما وبابا زمان.
خلاص راحوا سابولنا الوجعه وارتاحوا .
خلاص مولد النبي مابقاش معاه الفرح متحمر.
خلاص ولا شوربة الحاجه ولا الرز اللي متعمر.
خلاص لمتنا فوركيشه. خلاص حمو بقا طيشه .
ومش كان نفسك انااجبلك ولد فارس يكركبلك .
اديني جبت مرواني ومش جايب عيال تاني ده بيقول تيتا وحشاني ويسها ويا مصاصته وهو ضاربني برصاصته .
خلاص يا احمد خلاص ياحنان
مافيش ماما ..مفيش امي ..
مفيش ماما ..مفيش امي
تمانية اتناشر القادم هيبقالك تلات سنوات.
ياعايشه ياامه جوايا وجوايا ف بعدك مات.

تعليقات الفيس بوك