280 × 90

عبدالله هشام يكتب: سايق عليكي الهوى

927

سايق عليكى الهوى
انا عاوز اهدم سور
ده الحضن منك دوا
ينقذ قلوب البور
عشمان فى حضن يزيد
والايد تشد فى ايد
والعتمه تطرح نور
سايق عليكى الهوى
والبعد فى المسافات
بنفهم بعض من على بعد
باشاره من نظرات
فشل معانا كل قانون بيقول
ان البشر فترات
حلوه وانتى قصاد منى
واحلى وانتى من بعيد
عشت حياتك جوه منى
عرفت قبلك بنات اكيد
بس انتى اللى بالتحديد
عملت لقلبى قلب جديد
وغيرتى كل القوانين ..سبحانه
يحيى القلوب وهى رميم
سواء كانت امام البصر
او حاجه اجمل من القدر
او شئ منتظر .. من سنين
او قلب استوى ..
سايق عليكى الهوى
تخبطى فى قلبى الهوا
وتحسى باللى انكوى
عشان اللى بنا يدوم
سهل تبقى على الارض
وصعب انك تقوم
وانا غرقت جوه حضنك
ولحسن حظى بعرف اعوم
فاحضنى القلب اللى عافر
اطردى العقل اللى كافر
حياتى بره متلزمنيش
طول ما حياتى جواكى
خلينى جوه منك اعيش
احضنى جامد مش عاوز افوق
عالم وكوكب كله هدوء
والخالق هو اللى جاب مخلوق
وجبنا عشان نكمل بعض
كلبشى قلبك فى قلبى
كلبشى القلبين فى بعض
انا ملك ليكى كسرى كل الضلوع
وتعالى نبكى الحضن يكمل بالدموع
وقعت فيكى وكان ده احلى وقوع
مش عاوز بعدك اى حد
كملى الاحضان بجد
احضنى مشاعر … احضنى شاعر
عجز قلمه عن كتابتك
عن جمالك عن حلاوتك
عن كيانك عن علامتك
عن بدايتك عن نهايتك
عن كل حاجه فيكى معرفتش اوصفها
عن اللحظه اللى بستناها تطلع منها ضحكتها
لانى عارف بعدها كف ايدى هيلمس كف ايدها
عن كلام واحده عزيزه عليه لما قالتلى
اختار بيت شبه بيتك
بنت تفرح وقت فرحك
بنت تشيلك وقت ضيقك
بنت تحس معاها بوجود الاهل
كل شئ صعب معاها سهل
وكلمت ربنا عنك وقتله يارب عاوزها هى
حبى ليكى وحبك ليه .. علاقه حب طرديه
لو جيتى للحق انا القلقان
انا اللى محتاج للأمان
علاقتى بيكى يا حبيبتى
علاقه كان نفسى فيها زمان
علاقه احترام وتقدير
وعدم طلوعك بعد نص الليل
وعدم ضيقك منى عشان
عارفه ان بطبعى بغير
واللبس الضيق تنسيه
والضحكه العاليه متطلعش
وهحاسبك لو غلطى فى يوم
وانتى عارفه حسابى مبدفعش
وارجع احنلك اجبارى
بزياده يا قلبى بقى تدارى
ولا اقولك ماتدريش
عنيكى اصلا بقيت ليها درويش
بتسطل كل لما اشوفها
زى قاعده فيها دخان حشيش
حتا لو ألمحها بس
الدخان زى عينك
ممنوع الاقتراب باللمس
روحى تهرب بره جسمى
افتكر اسمك وانسى اسمى
وقت ما انتى تبتسمى
شعور غريب لكن يتحس
قمر ايه اللى تتوصفى بيه
القمر اصله جسم معتم
انتى اصلك تبقى شمس
عينك تشع فى الدنيا ضوء
قلبك يضم للدنيا شوق
وحضنك يحسسنا بونس
ونطلع معاكى لسابع سما
وضحكتك ديه اللى بعد ما شافها قلبى
ماشفش غيرها وعشق العمى
سايق عليك انت الهوى … اعترف
تعترف انى نجحت وخليت قلبك يختلف
كنت حالف ما تحب زمان
دلوقتى حاببنى زى الالف
بعشقك كعشقى للملكوت
بعشق فيك صدى الصوره
بعشق فيك صدى الصوت
بحبك موت … بحبك جدا
وبدعيلك مع كل آذان يدن
يا مدينه انا بس سكنها
جوه قلبى مليانه ورد
عمرى فى يوم عنك استغنى
وعمرى فى حضنك احس ببرد
سايق عليكى الهوى
يا عروسه لفى وزفى
وخلى كفك يلمس كفى
واحضنينى لجل تدفى
ونقسم مع بعض العيش والملح
حتا لو لقمه بس يكفى
قلوبنا خلاص لمسها الندى
سايق عليكى الهوى
بعد تعب وحب وعشق وشقى
انى هفضل اكتب واغنلها
وهمشى فى مدينتك لاخرها
وقلبى خلاص قالها لعقلى
ماتجيش وفى عينك عين غيرها
سايق عليكى الهوى .

تعليقات الفيس بوك
Share via