لو مصمم تدخن دخن بس حوش 5 أضعاف ما بتصرف على السجاير.. بقلم الدكتور بهاء منصور

خلينا نتفق إتفاق لو أنت مصمم تبقى مدخن وتضيع صحتك وفلوسك في الهوا شيل قدام كل علبة سجاير تشربها حساب 5 علب سجاير>>> دي تكلفة علاجك من جلطة حادة بشرايين القلب علشان لما تلف بأهلك في انصاص الليالي علي سرير رعاية مركزة وتبقي محتاج قسطرة قلبية عاجلة وماتلاقيش ولا سراير رعاية ولا قسطرة عاجلة ولا حتي دكتور متخصص في مستشفيات الحكومة تقدر ساعتها تجري تتعالج علي نفقتك الخاصة بتمن السجاير اللي دمرت بيها صحتك سنيين

دة شاب 45 سنة مدخن “علبة واحدة في اليوم” حس بألم في صدره إمبارح زي دلوقتى راح إستقبال مستشفي حكومى خد مسكن ومشي

جالي من ساعة من اول دقيقة قال كلمتين ” الم في الصدر ومدخن” قولتله وقف كلام وهسمعك بس بعد ما نعمل رسم قلب الراجل لسة عايز يكمل باقي شكوته قولتله لو سمحت رسم قلب الاول ونكمل كلام

التشخيص جلطة حادة بأهم شريان بيغذي القلب كانت بدايتها امبارح مع الالم ومحتاج قسطرة عاجلة علي الشرايين وتركيب دعامة دوائية
طيب يقدر علي تكلفتها لا بس هو قادر كل يوم الصبح يجيب علبة مارلبورو أحمر ينفخ فيها ويشكي ضيق الحال والرزق لخلق الله

حولته طبعا علي مستشفي حكومي آخر – بتقرير مكتوب تشخيصه ورسم القلب والاكو اللي في الصور لعمل قسطرة عاجلة وتركيب دعامة دوائية
مع أحترامي لكل الكيانات الطبية الكبيرة في مصر كلها والمجهود الجبار المبذول لانقاذ حياة ألاف مرضى القلب يوميا لكن مش كل مريض جلطة في مصر هيقدر يدخل القسطرة في يومها أو حتي بعدها بيوم نظراً لضغط الشديد علي الأماكن دي من أهل المارلبورو الأحمر الغلابة !!!
الخلاصة : هتشرب سجاير؟!! حوش مع كل قرش بتصرفه عليها 5 قروش علشان تتعالج بيهم لا محال أو أقولك بطلها وعيش حياتك بصحة وسط أهلك واولادك اللي بيبكوا عليك مع سمع كلمة “جلطة في القلب” وريح لنا قلبنا احنا كمان علي الوجع اللي بنشوفه من معاناتكم كل يوم

_هو انا كدة بقيت مريض قلب يادكتور؟!!!
_ايوة ياباشا ولو ماعملتش اللي بقولك عليه دلوقتي وبطلت سجاير كمان مش هتقدر تمشي من سريرك للحمام

تعليقات الفيس بوك
لا يوجود كلمات دليلية لهذه المقالة.

التعليقات مغلقة، ولكن تركبكس وبينغبكس مفتوحة.

Share via