د. أحمد على يكتب “” الطفل العنيد “”


138

العناد هو رفض الطفل المتكرر لقوانين الأهل التى يفرضونها عليه بدون سبب مقنع او المجادلة المستمرة والاصرار على سلوكه الغير مرغوب
خلى بالك
العناد عند الاطفال يعتبر من الخصائص الطبيعية فى مرحلة الطفولة المبكرة من سن 2-5 سنوات تقريبا
( الطفل فى المرحل دى بيعبر عن استقلاليته وعاوز يثبت ذاته )
العناد عند الاطفال سلوك مكتسب وليس فطرى او موروث.
( يعنى احنا الى بنعلم الطفل ازاى يعاند او يجادل وطبعا مش المقصود هنا الأهل فقط انما ممكن البيئة عموما )
ياترى اى أشكال العناد عند الاطفال ؟
أول حاجة : الطفل بيماطل وبعدين ينفذ المطلوب منه
ثانى حاجة : بيماطل ومش بينفذ المطلوب منه
ثالث حاجة : الطفل بيتجاهل الكلام ومش بينفذ المطلوب
رابع حاجة : رفض صريح وعدم تنفيذ
طيب ياترى اي الاسباب الى تخلى الطفل يعاند ويرفض الاوامر ويتجاهل الكلام ؟
1- القسوة الذائدة على الطفل : دايما منتقد ودايما شايفينه كبير وماينفعش يعمل الغلط !
2- محاولة لجذب انتباه المحيطين به : ودا بسبب اهمالنا له او تفضيل احد اخواته عليه
3- التقليد : لاحد أبويه أو أحد اخواته ( أوقات الأم تقول للطفل لاء من غير ماتوضح سبب رفضها لطلبه وهنا الطفل بياخد دا مثال ويقلده
4- التدليل الذائد : الدلع طبعا وان كل اوامره مجابه دا غلط لانه بيخلق عند الطفل حالة من ان الشي الى يطلبه ( كن فيكون )
5- تعزيز سلوك العناد : يعنى علشان الاب او الام يريح دماغه لو طلب من طفله حاجه وماعملهاش يقوم يعملها هو , هنا بخلق عند الطفل ان انا كدا صح وكل مره هارفض .
6- الاوامر دون ايضاح : لما تطلب من طفلك حاجه وضحله انت عاوز منه ايه وليه وبلاش صيغة الامر المباشر.
7- المقارنه بينه وبين الاطفال : كل طفل له سمات شخصية مختلفه عن غيره وله قدرات بتختلف من طفل لطفل . مقارنة الطفل بغيره ظلم للطفل وبينمى عنده احساس بالرفض لكل شئ .
8- رغبة الطفل انه يأكد ذاته وانه له دور وشخصية وسط اهله : هنا المفروض انى اعمل كنترول بين انى انمى عند الطفل ثقته بنفسه وبين انى اقتل فيه الرغبة دى واقلل منه واحسسه انه مش فاهم حاجه .
تعالو نشوف اى الجوانب الايجابية الاول لمشكلة العناد :
اولا: الاستقلالية
ثتنيا : عدم الانقياد
ثالثا : قوة الشخصية
رابعا : الاعتماد على ذكائه
ازاى بقي اقدر اتعامل مع طفلى العنيد : ***
1- بلاش صيغة الامر المباشر واستبدلها بصيغة الطلب : يعنى بلاش تقول مثلا ( كل السندوتشات ) خليها ( ممكن تاكل السندوتشات علشان تقدر تلعب وتبقي قوى ) بلاش تقول ( هات المفتاح ) خليها ( ممكن تجيبلى المفتاح لو سمحت )
2- شارك الطفل فى انشطة البيت ويكون تحت اشرافك
3- وضح للطفل سبب طلبك للشئ او سبب رفضك للشئ.
4- خلى طلبك محدد وبلاش تطلب منه اكثر من طلب على حسب قدراته وانتباهه وتركيزه
5- خليه يحس بالاعتماد على نفسه واستقلاليته من خلال انك تعطيه فرصه للاختيار بين اشياء لا تسبب له الضرر
6- خلى بالك من نبرة صوتك وانت بتطلب منه القيام بشئ معين ( يعنى بلاش تدخل الهزار فى الجد والعكس )
7- بلاش نعزز سلوك العناد عند الطفل لما يطلب شئ غير مسموح به
8- بلاش نظرة التحدى مع الطفل . وهنا بفرق بين انى اطلب منه الشئ واصر عليه وانى اعامله الند بالند
9- ياريت نراعى الحاجات النفسية عند الطفل مثل الحب والحنان والعطف والاحتضان والتشجيع . مايبقاش كل همى هو انى اشبع الحاجات الماديه من فلوس والعاب وهدايا وبس.
10 – تجنب الطفل اى خلافات اسريه
11- بلاش استخدام اساليب التربيه الخاطئة مثل الضرب والقسوه والاهانه للطفل
12- بلاش تلصق به كلمة عنيد علشان مايصرش على العناد اكتر
13- استخدم اسلوب القصص المصوره لتعديل سلوك طفلك
14 – استخدم اسلوب العقاب بالحرمان من الحاجات المفضله اليه زى اللعب او الفلوس والتشجيع بالمدح فى تعزيز سلوكه الصحيح
15- اخيرا والاهم خليك قدوه حسنه لابنك ( لو انت عصبى هو هايكون عصبى لو بتعانده هايعاندك ) لازم انزل لمستوى قدرات الطفل واعامله بطريقة مختلفه
دمتم سالمين مع تحياتى
أحمد على